أبيات شعرية

سلام للي وصلهم اول العام اللي لهم بالقلب قدر وحشيمة لعيال ابو محيسن ولعيال الأعمام  كلٍ بدرب الطيب له وزن وقيمة وعيال عمي مسندي هم لنا حزام من دونهم حنا بليّا عزيمة على الصدر أنتم نياشين ووسام وانتم ظلال الشمس درعٍ وغيمة العين تسهر لآخر الليل ما تنام لو ان واحدنا جرى له ظليمة وتحز بالخاطر ليا شفت منضام لواحدٍ جت له ظروفٍ جسيمة عسيرةٍ قشراء وبه كسرة عظام تفوق طاقات اليدين الكريمة من شينه الصاحي ليا طاح ما قام يتيه في وسط الدروب العتيمة ما تنجبر الا مع صيام وقيام الربنا محيي العظام الرميمة يالله يا رحمن يا رب الأنام هوّن على أهل القلوب الكليمة يالله تجمعنا على طول الأيام بالصحة والخيرات ربي يديمه  

أثْر المشاعر تِتعب الناس بالحيل تصبح على حالٍ وتمسي على حال لا منّها فاضت كما فايض السيل سيلٍ يخابط بك من الجال للجال امّا تعسفها مثل ماتِعسَف الخيل والا تعثر كان ما انته بـ خيال وان كان ما تصبر على فوحة الهيل لاشك يبدي منك ردات الأفعال راع المشاعر واحذر تزوّد الكيل أُوزن كلامك قبل تنطق بمكيال واحذر من الزلّة ترى نارها ويل ما يِخمده مزنٍ ولا غيم هَمّال وأْعرف تميز راعي القال والقيل فتان بين الناس وللهرج نقال خلك بعيدٍ عنْه وأبعد من سهيل كان السعَد ترجيه يا طيّب الفال ولا ترتجي شمس الضَّحى بظلمة الليل ولا يستقيم العود من عقْب ما مال يناير 2026م 

ذاب السنام الي على الظهر مرتز والجسم أصبح عقبه ضامر وذاوي يا بوي حنا لا ذكرناك نعتز نفخر بأسمك ونصدح به عزاوي ترى النجم لا طاح بالأرض تهتز وانا على طيحته مانيب قاوي اليوم قلبي بين الأضلاع مجتز ما ظنتي للحزن أحدٍ يداوي  

جتني رسالة من عزيزٍ وغالي مفادها ربي رزقني بمولود يالله تصلح لنا ابن المعالي وتجعل طريقه سالك سهود ومهود واجعل مكانه بالسماء فوق عالي وافتح بوجهه رزقةٍ ما له حدود هذا السمي يا حظي وطيب فالي هذا فهد وانا فهد نسل الفهود بيني وبينك يالرفيق الموالي ذكرى سعيدة والزمن ليته ايعود أيام ولّت بين مرٍ وحالي ذكراه تبقى مثلما ريحة العود مايو 2025م 

بعض المجالس فرقوها أهلها بأسباب شرهاتٍ وكثر المناقيد الله عطى خلقه ظروف وجعلها متفاوتة عن بعضه بكل تأكيد مشاعر الناس ورضاها وزعلها يبغى له امدارى مع شوي تمهيد نق السوالف صَفّها ثم قلها واحذر بعَضها مثل رمي البواريد ان جيت للطينة تحوسك وحلها لو انت متنكد تبي تزود تنكيد هذي طمان الأرض وهذا جبلها إبعد عن السهلة وإرقى الصواعيد ومن البشر لا تخاوي الا فحلها وخل مجلسك بين الرجال الصناديد الي تلبي من نصاها وسألها وتطق بيبانَه بليّا مواعيد بصماتهم محدٍ نساها وجهلها تلقاها بين الناس من دون تحديد ان جيتَه ابزلّة نساها وغفلها يفتح لك الصفحات بيضاء من اجديد وان جيت تشكي له همومك حملها ويبسّط الأوضاع من دون تعقيد انزل منازله الي جاها ونزلها خلك بجنبه دايماً منتب بعيد  

يا هلا بأهل الضبَط ربعي العواسه الرجال الي لهم عزٍ وشاني ساكنين عنيزة الفيحاء وِناسه من زبنهم يحتمي عِرضه يصاني من عقب ما شفتكم جتني حماسة العواسا عزوتي ما فيه ثاني من عرفكم ما عرف معنى التعاسة بالوفاء يشهد لكم قاصي وداني أهل علم ودين من غير الدراسة بالمراكز لأوله إلْكم مكاني لو تدوّر التعلّل والوناسة ما تلاقي مثلهم طول الزماني لو أحد منهم نخيته شاش رأسه للنداء يفزع يلبّي في ثواني جدّنا احمود هو شيخٍ وساسه من هذيل حتيرشيٍ ما يهاني المصاعب هو وطى عليَه وداسه من حجاز العز إلى نجد الأماني والذيابة من طبايعها العساسة اليا جاعت ما تصيد الا السماني عارفين لكل واحد له مقاسه كل قياسٍ له تفاصيل ومعاني والاصابع طولها حسب السياسة لو قصار انطوّله طول المباني والطويل نقصّره لو مَعْه فاسه بالفعال نحَجّمَه مب باللساني نرتقي عن كل دربٍ به نجاسة للنوايف نتجه مب للطماني